﻿Zabur 17
PIINTADUWA DIT ULUN DOT ASO SALA

(Pemimpin)
! Piintaduwa di Daud.

(Jemaat)
O TUHAN iningo no iti gama ku humulu, it indamo ku do kotimbango. Itungo no it ihad ku, iningo no i piintaduwa ku dot otulid.

(Pemimpin)
Ikau no o mangapad dohon, tu Ikau o kelo do nunu ot abanal.

(Jemaat)
Ikau no o kotutun di ginavo ku. Ong rumikot ko sid dohon do sodop, om mongombiri banal dohon, asot emot Nu sid dohon dot kikenginan tara'at.

(Pemimpin)
Amu oku momoros dot ara'at yadko it ulun vokon, tu sumuhut oku di pinonuhuan Nu, om amu oku mangagama do kokodoho.

(Jemaat)
Yoku diti soumul sumuhut di tudukan Nu om amu oku kopiti'im sumimpang.

(Pemimpin)
O Kinoringan, mintaduwa oku sid Dikau, tu ambaton oku Dikau, sabap ino, kovili no sid dohon om iningo no it ongoboros ku.

(Jemaat)
Pematai no i samod Nu di kovongo-vongo, om sopulai no it ulun di sumunsud sid Dikau, tu ong sid toning oku Dikau, osopulan oku antad sid sokoviai i sangod ku.

(Pemimpin)
Likupai oku no do yadko i gama Nu manaud di linsou di mato Nu kondiri. Posusuto oku no sid sahau dit alad Nu,

(Jemaat)
likupai oku no antad sid ulun tara'at i monginam dohon. Notutukan oku no di sangod ku i mongorungoi di koposizan ku,

(Pemimpin)
yoti dino asavat i ginavo om amu obinsianan.

(Jemaat)
Gusaon sampai limputan oku dioti, tu mogihim do vaza'an mangaratu dohon.

(Pemimpin)
Yoti dino yadko i mondou, kiivou do monginis-kinis dohon, yadko it anak do mondou i sumusut magavang dohon.

(Jemaat)
Ingkakat no o TUHAN, saapo no om torio no i sangod ku! Sopulai oku no di sapadang Nu antad sid ulun tara'at.

(Pemimpin)
O TUHAN, sopulai oku no antad sid ulun di mongumpug di harata sid pomogunan. Hukumo no yoti do kapagasan i nosodia Nu no laid do dang dioti, do sampai it ongomuaki dioti nga ohukum-i.

(Semua)
Kemot oku di vuros Nu tu yoku diti aso sala, om kodung oposik oku no, humigak oku no, tu sid toning ku no Ikau.

